* * * Болур болза, дизер болза, Борбалчыңнаан караам чажы Эгээртинмес Энерелим Эрегези болур ийик. * * * Сөстер чокка чажыдыңны Сөглеп турар кижи чордуң. Кайы хире меңээ ынааң Карактарың миннип туржук. * * * Моондактар оруувуста эңдерилген. Моон соңгаар ужуражыр аргавыс чок. Шаңгыр-шаңгыр карактарың, ынчангы час... Сагыжымда чажыт ыр бооп куттулуп чор. * * * Күзүңгү дег төгерик ай Күскү дээрден харап алган, Ажыт бодал-чажыттарым Ажыдар деп кызытканзыг. * * * Көксү-хөрээм бачымнаткан Көвей бодал-сагыш аагы– Хөнүп чадаан чуртталгамның Хөөннешпээн аяны бе? * * * Чоруй бардың. Соонда катап келбес-тир деп, Шала муңгак бодап ора:- Чааскаанзырал, экии!-дидим. * * * Алды чүзүн малын малдаар Аңгыс-шөлдер ээн калбаан, Арат боду оъттап чоруур "Амыдырал шөлү" болган... |
|